اهلا اهلا شرفتونا ونورتونا
اهلا بيكم اجمل ناس ايه الكلام الجميل اللى بقوله ده انا المفروض كنت ابقه مذيع فشر مفيد فوزى
المهم اكملكم بقه حكيتى مع نصفى الوحش عدوله
احنا وقفنا لحد فين اه لحد اما عزمتها على اكل فى مطعم 5 نجوم وبعدين قلتلى انت جبت الفلوس منين وقولتلها انا مجبتش فلوس اصلا فااغمى عليها من شده الخوف جبانه قوى
ولما فوقتها قلتلى امال هتدفع تمن الاكل ده ازى منك لله هننضرب قولتلها بس اسكتى انا شوفت فيلم امبارح عند سمير اخو حسين ابن عم حموده صاحب توفيق صحبى وهعمل زى البطل معمل قلتلى هو عمل ايه قولتلها
جاب صرصار وحطه فى الاكل ولما جه الجرسون يطلب الحساب زعقله وقله هتلى المدير ايه القرف ده ازى الاكل يجى كده بصرصار
وفضلت ادور فى المطعم على صرصار او حتى نمله ملقتش المحل كان انضف من الصينى بعد غسيله عالم فافى
المهم كنت هتجنن وكل شويه الجرسون يجى باالحساب وانا اقوله هتلى قهوة هتلى حلو لما بطنى كانت هتفرقع من كتر الاكل
واخيرا جالى الجرسون المعفن وصمم انه لازم يحسبنى علشان هيسلم الورديه
المهم نفخت نفسى وشديت حيلى وقولتله ممكن كاسيت وشريط الحلم العربى استغرب جدا بس جبهملى وبعد مجبهم قولتله اندهلى المدير انا معيش فلوس احاسب ولما جه المدير شدنى من قفايه حته شده وكان لسه هيلبنى على قفايه بس قبل ميعملها شغلت الشريط وطلع صوت الاغنيه بيقول
(ماتت قلوب الناس ماتت بلا نغو يمكن نسينا فى يوم ان العرب اخوة )
وفضلت امسح دموع المدير
ووصلنى لحد عربيته ووصلنى لحد البيت انا وعدلات وعدى اليوم من غير ضرب
الحمد لله
ايه بتسالونى اما انا متكسر كده ليه اه
اصل بعد مروحنا المدير عدلات قامت باالواجب وروقتنى منها لله
يلا تصبحو على خير وياريت دعوة من كل شاب لاخوهم فى الجهاد محروس بطول الصبر على الازمه اللى هو فيها عدلات كلها ازمات
سلام ياعسل
الأربعاء 4 مارس 2009 - 23:20
