السلام عليكم ورحمة الله وبركاته
اولا كل عام وانتم بكامل الخير والحب والصحة وراحة البال
ثانيا اسمحوا لي ان اتكلم وافضفض واخرج مكنون مابصدرى بالعامية
وهى التي احب التحدث بها عندما يكون قلبي مشحونا بما يؤرقه
**********************************
مش عارفة أبدأ منين ولا أقول إيه
أفّضَّل إني أحكى من أي مكان يقف عنده قلمى ويميل إليه قلبي
*******
حاسة إنى زهقانة وبمر بحالة أرق وضيق وقرف من كل شئ فى العالم كله
ولا مبالاة غريبة تجاه اى شئ وكل شئ
لدرجة انى بيتهألي إن الدنيا لو اتحرقت من حوليا مش هتحرك
وهقعد اتفرج وكأني فى سينما
محدش يسألنى عن السبب لأنى نفسى معرفوش
حاسة حياتى متلخبطة
والغريبة إن اللخبطة دى مريحانى ومش تعبانى
انا اتعودت ديما انى أفكر وأشَّغل مخى قبل اى تصرف بعمله
وديما فى أى موقف بحسب وبعدد جميع الاحتمالات علشان اكون مستعدة ديما لأى مفاجأة
بطلت وبحيت أعمل كدة .. بقيت زى القطار إلى بيدوس ويمشى وخلاص
والى يحصل يحصل .. مش مهم إيه يتم أو يحصل
المهم إنه حصل وخلاص
بطلت أزعل قوى على أى حد زى زمان
وده مزعلنى .. والغريب إنه بردو مفرحنى
لإنى من زمان كان نفسى أبقى كدة
************
زمان كنت بتمنى مرة من نفسى أبقى شريرة مزعلش على حد ولا على حاجة
وأهو بقيت تقريبا والحمدلله .. وبردو مش مرتاحة
**********
فى بلدى كنت تعبانة .. سبتها وطفشت
والله تعبت أكتر وماارتحت ..
ياناس .. نفسى أهرب .. أهج .. أطفش .. بس لفين وعلى فين
***********
لو كانت المجرات التانية مفتوحة مزارات سياحية كنت اول واحدة رحت هناك
بس بردو بيتهيألى إنى لو رحت .. العالم كله هيبقى فى ذيلي متشعلق فيه
ماهو انا كدة عاملة زى قليل البخت الى يلاقى العظم فى الكرشة الى هى اساسا بتبقى خالية منه
المهم
**************
انا جيت هنا ارمى بعض حملي ووجعي وهمي
مش عاوزة اى تعليق ولا اي شفقة ولا طبطبة ولا اسمع كلمة معلهش
لانى ببساطة هرد واقول .. ولما هو معلهش كانوا شنقوه ليه
انا بس حبيت ارغى مع نفسى بصوت عالى
ملقتش غير هنا
غرفتى الخاصة بقى وانا حرة فيها
ويللا سلام كفاياني وكفاياكم كدة
وكل سنة وانتم طيبين
السبت 7 مارس 2009 - 23:00